Tag Archives: Pilipinas

Megatent National Bookstore School Supplies Relief Packing

litratongpinoy

Masinop.

Ang salitang masinop ang napaka-flexible at maaaring gamitin sa iba’t-ibang konteksto.

Mahirap mag-volunteer sa gawaing pag-impake ng mga relief goods, dahil sa ganitong gawain, gaya ng nakikita ko sa telebisyon, wala kang choice sa kondisyon at wala ka din bayad. Ngunit nung kaming mga mommy bloggers, sina Jane, Chats, Cookie, Salen at ako ay nagpasiya na sumama sa pag-impake ng mga school supplies mula sa National Bookstore mula sa Megatent (malapit sa DepEd sa Pasig), hindi naman pala gaano kahirap.

Marahil dahil ito ay bukas sa aming puso. Marahil dahil kung kami ay magkakasama, kami ay likas na masayahin at palatawa kaya nakaka-gaan sa trabaho.

Anyway…

Ang pagiging masinop ay aking ilalarawan sa aming ginawang pagtulong sa pag-impake ng mga school supplies para sa mga batang apektado ng dalawang delubyong dumaan sa ating bansa.

Ayan, mga notebook, papel, lapis at bolpen na ilalagay sa mga plastik. Kelangan masinop ang paglagay para hindi nakikita ang presyo ng notebook sa likod nito at dapat nakaayos din ang tali ng notebook para di masunog kapag sinelyuhan na ang mga ito.

Kelangan din masinop ang sistema upang mapadali ang pagtrabaho, tipong nasa assembly line.

Sa susunod na linggo, kelangan pa din nila ng volunteers ulit para sa pag-impake ng mga gamit na may kasamang mga bag.

Punta lang kayo sa Megatent, malapit sa DepEd sa Pasig, NBS Foundation people will be at Megatent from Tues-Fri next week, 3pm to 12MN.

Daig ng Maagap ang Masipag

litratongpinoy

EDSA at 8am

Ang kasabihan ng mga matatanda, “daig ng maagap ang masipag”.

Hindi ko alam kung ito ang English version ng “the early bird gets the worm”, hehehe, ano sa palagay ninyo?

Tama din naman yang kasabihan pero dapat ito ay may kaakibat ding kasipagan.

Ayan, maagap sana kami, maaga umalis ngunit ganun din pala ang nasa isip ng karamihan kaya yan, nagdulot ng trapiko.

Sabagay di na bago itong ganitong karanasan, manhid na yata tayo sa trapiko.

Nga pala, kita niyo yung smog? Sana maagapan ang problemang iyan na nagdududlot ng sakit.

Sagot Sa Kagutuman

litratongpinoy

Tamad daw ang karamihan sa mga Pilipino. Maaaring totoo, maaari din namang hindi para sa ilan.

Isa ang labis na kahirapan sa problemang kinakaharap ng bansa. Hindi ko na lang hihimayin ang mga dahilan dahil baka abutin ako ng gabi di pa ako tapos magsulat dito.

Dala ng problemang ito ang isa pang problema: kagutuman.

Pero ang kasabihan natin, kung gusto magagawan ng paraan.

Anu-ano nga ba ang mga paraan na puwede maging sagot upang maibsan ang kagutuman?

Ang pagtatanim sa bakuran.

Walang espasyong lupa? Maging malikhain at gumamit ng ibang paraan kagaya nito:

pechay

Medyo mukhang ginutom din ang aking pechay dito at tila bagang ako naman ang tinamad magdilig :D

Pero hindi ba mas mainam ang ganito, magtanim sa bakuran dahil isa ito sa sagot sa gutom, huwag lang tatamaring gumawa ng paraan para sa kasagutan nito.

At isa pa, nagamit muli ang dapat ay itinapon nang mga lalagyan ng inumin.

Huwag na pong tanungin bakit marami kaming mga ganyang lalagyan ng inumin, alam nyo na yun, hehehe.

Magandang araw ng Huwebes :)

Makabagong Palengke

litratongpinoy

Ang palengke. Bow.

Ilalagay ko sana ang larawan ng talipapa pero nagbago ang isip ko kaya ito na lang, isang makabagong palengke na tinatawag na “MALL”

makabagong palengke

Sa palagay ko maraming hindi na nakatutuntong sa mga maputik, madulas, mabaho at maingay na palengke ang karamihan sa atin.

Oo nga at mainam mamili sa mga aircon na pamilihan, nakakawili sa dami ng makikita, di pa mainit, maputik at mabaho.

Pero ano nga ba ang epekto nito sa mga maliliit na negosyo? Karamihan sa kanila, nagsasara na dahil lugi na. Paano naman, wala na gusto mamili sa kanila, at karamihan, doon na sa supermarket mamimili.

Akala ko noong una, sa lalawigan lang nangyayari yan. Aba, sa takbo ng mga pangyayari, bawat kanto yata meron nang tindahang “We’ve got it all for you”. So, saan  ka pa?

Paalam, Tita Cory

Nakapako ang karamihan sa mga Pilipino sa buong mundo sa mga kaganapan ng paghahatid sa huling hantungan ng ating mahal na dating pangulo, Corazon C. Aquino.

Narito ang aking tribute sa ating namayapang pangulo.

Ipagpaumanhin nyo mga kasama, hindi ako sumunod sa tema.

Nais ko sana maghandog ng maliit na regalo para kay Tita Cory:

sunflower

Bakit sunflower ang napili ko mula sa baul ng aking mga naipon na larawan?

Dahil ang sunflower ay isang bulaklak na napapagbibigay ng galak at ngiti sa ating mga labi. Ito ay nakapagpapagalak sa mga pusong nalulungkot. Ito ay nagbibigay liwanag sa isang madilim na kapaligiran.

Ito ang aking handog kay Tita Cory.

Tapos na ang mga seremonyas. Naging mabigat at madamdamin ang araw na ito para sa atin. Ang aking dalangin ay nawa nagkaroon tayo ng mabuting alaala mula sa buhay ni Tita Cory at gaya niya, maging instrumento na makapagbibigay ligaya at ngiti hindi lamang sa ating mga mahal sa buhay kundi pati na sa mga taong ating nakakasalamuha sa araw-araw.

Paalam, Tita Cory. Hanggang sa muli.