Ano nga ba ang pangarap ko? Noon, marami akong pangarap para sa aking sarili. Makapagtapos ng pag-aaral, magkaroon ng maayos na hanapbuhay, masayang pamilya, mabait na asawa at mga anak. Natupad naman yun. Hindi man kami mayaman, ayos lang, magsisikap na lang ng todo para sa pamilya, at yan ang pangarap ko sa ngayon.
Masarap mangarap.
Ito ang nagiging basehan ng lahat ng mga ginagawa at gagawin para sa katuparan nito. Maaaring kung minsan pinagtatawanan tayo ng iba dahil mataas daw ang lipad ng ating pangarap at baka bumagsak mula sa tore ng panaginip. Hindi na lang ito dapat alintana dahil dapat alam mo kung ano ang iyong kakayahan at kahinaan.
Pero sila, ano kaya ang pangarap nila?
Ang makahanap ng makakain bago matapos ang araw?
Ang makahiga sa malambot na kutson?
Ang magkaroon ng tsinelas o salawal?
Ano kaya ang pangarap nila?
Ikaw, may kasama bang ibang tao na hindi mo kapamilya sa mga pangarap mo?
